E Enjte, 04 Mars 2021

Akademia e Studimeve Politike në bashkëpunim me Shoqatën për Kulturë Demokratike dhe Institutin e Studimeve Politike dorëzoi zyrtarisht pranë Komisionit Qendror të Zgjedhjeve një kërkesë për ndryshimin e rregullores për raportimin e veprimtarive të ndaluara të zyrtarëve të lartë publikë gjatë periudhës parazgjedhore.
 
Eksperienca e këtyre dy muajve të parë të funksionimit të kufizimeve të parashikuar në Kodin Zgjedhor si dhe vendimmarrja e Komisionit të Ankesave dhe Sanksioneve (KAS), ka bërë të domosdoshme rishikimin e rregullores së miratuar nga Komisioni Rregullator i KQZ. Për më tej, rrethanat dhe sjellja e palëve subjekt i kufizimeve të parashikuara mund të krijojnë nevojën që këto urdhërime të ndryshohen dhe përmirësohen kjo për të garantuar frymën e Kodit Zgjedhor.
 
Më konkretisht tre propozimet e paraqitura janë:
 

• Ndryshimi i pikës 1.1 e nenit 3 të Vendimit 9/2020 duke hequr togfjalëshin “për të cilat janë vënë rishtazi apo posaçërisht në dispozicion, apo janë transferuar fonde publike jo sipas planit buxhetor të miratuar, në periudhën 4 (katër) mujore para datës së zgjedhjeve”.
  
• Përfshirjen e mediave sociale në përkufizimin "media publike" duke evituar mangësie dhe inkoherence në identifikimin dhe përcaktimin se çfarë përbën “veprimtari publike”.
• Qartësimin e përgjegjësisë administrative të zyrtarëve subjekt i kufizimeve të veprimtarive të ndaluara.

Kërkesa u mor në dorëzim dhe pritet të shqyrtohet me tej nga Komisioni Rregullator pranë KQZ në ditët në vijim.                                                                                                                                                                                               Kërkesa e plotë mund të konsultohet këtu